TWAALFUUR 1
Toe ons kinders was, het
ons ‘n speletjie gespeel nl. Wolf, Wolf, Hoe Laat Is Dit? Een van die maats het
die wolf voorgestel en vooruit gestap met sy rug op die ander maats gekeer. Die
ander kinders het dan agterna gekom en al roepende gevra: “Wolf, Wolf, hoe laat
is dit? Dan het die Wolf ‘n tyd geskree: “Nege-uur!” So het die maats aanhou
vra: “Wolf, Wolf, hoe laat is dit?” Die tyd het al nader na twaalfuur geskuif.
Wanneer hy onverwags “twaalfuur” skreeu, het die wolf omgespring en die naaste
een wat onbedag was, gevang. (Die laaste keer wat ek hierdie speletjie gespeel
het, sal ek nie vergeet nie, want ek het my arm daardie dag gebreek / gekraak –
dit net so voor ek Sub – A toe moes gaan.)
Iets soortgelyk glo ek, sal die koms van Jesus op die wolke vir Sy
bruidsheiliges wees.
DIT SAL ONVERWAGS WEES
Sewe keer gebruik die
Skrif die voorbeeld dat die Here Jesus sal kom soos ‘n dief in die nag. (Mat. 24:23; Luk. 12:39; 1 Thess.
5:2; 1 Thess. 5:4; 2 Pet. 3:10; Open. 3:3; Open. 15:16). Soos ‘n dief onverwags
kan opdaag om in te breek, nét so sal die Here Jesus kom wanneer die aardbewoners
dit die minste verwag. Die “nag” spreek van die
nagtelike ure wanneer almal slaap en nie waaksaam is nie.
NIEMAND WEET WANNEER
As iemand meen dat hy ‘n datum het vir die koms van Jesus vir sy
bruid, moet hy of sy net weer gaan kyk wat sê Mark. 13:32 – “Maar van daardie dag en
dié uur weet niemand nie, ook nie die engele in die hemel of die Seun
nie, maar net die Vader.” God
vertrou hierdie datum nie eens toe aan sy engele in die hemel nie. Moet dus
nooit iemand glo wat met ‘n wilde bewering en berekening ‘n datum wil voorsien
nie. Ons kan wel die seisoen waarneem (Mat. 24:32). Wat my betref het die
seisoen lankal reg geskuif vir Sy koms.
Tragies om te besef dat
terwyl die Bruidegom presies weet waar die bruid is, en wat haar toestand is;
weet die bruid nie, waar die Bruidegom Hom bevind t.o.v. tydlyn en seisoen van
koms nie.
- Dis asof dit hulle nie raak as ek na
sommige se lewens kyk.
- Sommige het geen wederkoms verwagting.
- Ander stel sy koms daar ver asof Hy nooit
gaan terugkeer nie.
My grootste wens bo enigiets anders: Dat Jesus nóú moet
kom!!! Dan is die wat gereed is
en gevolglik weg is, verlos van alle ellende, boosheid en pestilensies wat hier
op aarde is!!! “Sal dit dáár nie heerlik wees nie, want die Lam is altyd
daar!!!“
Jy ook?
GEBED
Here Jesus, Bruidegom
van my lewe, terwyl die wêreld opgaan in sinsgenot, smag ek na U en U spoedige
koms vir U bruidsheiliges! Amen.
Pastoor Piet Smit
Koningsdogters vir Jesus Bediening / Facebook
