Glimlag

Die vrolike hart het gedurigdeur fees.  -  Spreuke 15:15 OV

Ons sê, oog omhoog en hand aan hand gaan ons blymoedig voort van dag tot geseënde dag – ons hou sommer gedurigdeur fees!  Maar wat van al die ander mense om ons?  Ons kan tog nie alleen fees vier nie?  Dan moet ons hulle ook opgeruimd en vrolik maak.  Hoe?  vra u miskien.  Daar is niks wat menseharte so aanraak as ‘n vriendelike glimlag nie.  Kom ons glimlag dan vandag!

Ons stralende glimlag wat in ons oë gesien word en ons hele gelaat ophelder,  *DÍT*  is die soort glimlag wat andere aanraak tot hulle nie anders kan as om saam met ons te glimlag nie.

Hoe gaan die deure tot vriendskap en liefde nie oop voor hierdie soort glimlag nie!  Hoe aangenaam die dag, want, in die woorde van ‘n digter, my hart glimlag glimlaggies vandag!  En hoe waar is dit nie -  die opregte glimlag wat liefde en vrede oordra, word gebore in die hart.  In ons hart weet ons dat God met ons is – en omdat ons dit weet, het ons hart alle rede om te glimlag, en het ons alle rede om vir die lewe te glimlag!

Gebed:  My hart glimlag glimlaggies vandag!

~ Uit Daelikse Woord ~

Koningsdogters vir Jesus Page @ Facebook

Al die eer aan JESUS!

*Poppie Oosthuizen*