DANKIE,  VADER

Wees altyd bly.  Bid gedurig.  Wees in alle omstandighede dankbaar.

1 Tess. 5:16-18

“Heer van my hart, ek is miskien nie daartoe in staat om my gedagtes en gevoelens in digterlike woorde van lof en dank uit te druk nie maar my hart is vol lof en waardering.  Ek weet dat my eenvoudige  “Dankie, Vader”,  U bereik, en dat U sal verstaan dat dit gevul is met my waardering vir die skoonheid van hierdie môre, en die mense wat my dag sal vul.  My  “Dankie, Vader”  vertel ook vir U van die waardering wat ek het vir die liggaam waarin ek lewe, vir al die wonderlike dinge wat dit vir my doen en my toelaat om te doen.

Terwyl ek  “Dankie, Vader” sê, wel daar in my hart ‘n gevoel op wat nie maklik is om te beskryf nie.  Ek onthou ou klein dingetjies waarvoor ek dankbaar is.  Ek onthou die viooltjies van verlede lente, ‘n kerskaartjie van ‘n vriend wat ek gedink het my al vergeet het, ‘n kind wat sy vriendskap aangebied het.

Dis maar ‘n paar van die gedagtes in my oorvol hart terwyl ek my na U wend in lof en waardering, Heer van my Hart.”

Gebed:  Dankie, Vader!

~ Uit Daelikse Woord ~

DANKIE!

Wees in alles dankbaar. – Tess. 5:18 OV

Sê dankie, dankie, dankie!  As iemand ons deur die dag seergemaak het, wat onthou ons? Die belediging – die seer?  Tob ons daaroor en kry ons onsself al hoe meer en meer jammer?  Dan het ons skoon vergeet wat Jesus se opdrag was omtrent die seer wat ons saam met ons rond dra – die seer wat uiteindelik ‘n wrok word.  En in plaas van nog ‘n geleentheid om op te staan en voort te wandel in die lig van ons Heer en Meester, sit ons vas met ‘n wrok-ketting om ons enkels… Of gaan ons sommer gou iets daaromtrent doen – voor ons sit met ‘n wrok wat al hoe moeiliker is om van ontslae te raak? Maar hoe?

Ons kyk daarna met die oë van ons siel, en ons sien dit wat met ons gebeur as lesse wat ons steeds voorwaarts en opwaarts lei op ons lewenspad, en stadig maar seker sal die seer verdwyn en plek maak vir ‘n innige  dankbaarheid  uit die diepste dieptes van ons hart! Ja, ons dankbaarheid ken geen perke nie!

Gebed:  Dankie, dankie, dankie, Heer van my hart!

~ Uit Daelikse Woord !

DANKIE, HEER

En nou loof ons U, ons God, ons prys U glansryke Naam.  – 1 Kron. 29:13

Dankie, Heer, vir hierdie mooi wêreld wat U geskape het.  Die uitspansel, die sterre, die wolke – alles is ‘n nimmereindigende bron van verwondering.  Die bome, die blomme, die diere – die ganse wêreld weerspieël U orde en skoonheid.

Dankie, Heer, vir die gevoel van eenheid en harmonie met die mense in my lewe, wat in my ontwaak – nie net vir diegene wat ek liefhet nie, maar vir elkeen wat ek elke dag mag teëkom.  Ons word almal in U liefde toegevou.

Dankie, Heer, dat U my geseën het met ‘n sagte hart.  Ek is ontvanklik vir U liefde, wat deur my vloei en sigbaar word in die liefde en goedhartigheid wat ek met andere deel.

Dankie, Heer, vir die gevoel van waardering wat U in my geplant het, want ek weet ek is ryklik geseënd.  Ek is ‘n geestelike wese, wat elke dag blymoedige voortgaan in U lig.  Ek loof U en dank U, Heer, want U is altyd met my.  U vou my toe in U liefde.

Gebed:  Dankie, Heer, vir alles!

~ Uit Daelikse Woord ~