Hoe lyk jou huis?

Kom lees saam met my ‘n hoofstuk uit Nina Smit se boek In God se Omhelsing

(Dit is So Spesiaal vir ons Vroue Bedoel!)

Hoe lyk jou huis?

‘Marta was baie bedrywig om alles klaar te maak ....

Maar die Here antwoord haar:  “Marta, Marta,

jy is besorg en bekommerd oor baie dinge,

maar net een ding is nodig.

Maria het die beste deel gekies,

en dit sal nie van haar weggeneem word nie.”’

Lukas 10:40-42

Tydens ‘n besoek aan die Grahamstadse kunstefees ontdek my perfeksionistiese ander helfte ‘n stalletjie met die mooiste yskasmagnete met allerhande interessante spreuke daarop geskryf. Goedgunstiglik bied hy aan om vir my een te koop.  Maar as ek uiteindelik – ná letterlik ‘n uur se gelees en gegrawe – my keuse triomfantlik aan hom oorhandig, weier hy eers botweg om daarvoor te betaal!  Dié man van my sluk naamlik al sewe-en-twintig jaar lank swaar daaraan dat hy met ‘n vrou getroud is wat veel minder netjies as hy self is.  ‘A well-kept home is a sign of a misspent life,’ proklameer die fraai magneetjie van my keuse.  En hoe hartgrondiglik stem ek nie daarmee saam nie!

Dit is ‘n probleem van vroue die wêreld oor dat hulle veel meer dinge het om te doen, as tyd waarin daardie dinge gedoen moet word. 

(1 van 4)