God praat deur sy skepping - gebed

God praat deur sy skepping

U het baie dinge geskep, Here, die aarde is vol van wat U gemaak het.  Mag daar aan die roem van die Here geen einde wees nie!  Mag die werk van die Here Hom vreugde verskaf.  -  Psalm 104:24, 31

Here,

Ek wil U loof as die Skepper-God.

Hoe goed en mooi is alles wat U gemaak het,

hoe ongelooflik en vol verskeidenheid u handewerk –

sodat ek in elkeen van u skeppings en skepsels

u heerlikheid kan raaksien en

U daardeur met my kan hoor praat.

Gee vir my die vermoë

om my oë en ore oop te hou vir u stem,

om fyn te luister

en nooit aan die skoonheid

van die natuur gewoond te raak nie,

maar dit elke dag opnuut te ontdek.

Dit laat my verstand duisel

dat ék die kroon van daardie skepping is

omdat U ‘n stukkie van Uself in my ingebou het.

Maak my absoluut gehoorsaam aan U,

gewillig om U te dien so lank as wat ek leef

en help my om U bo álles lief te hê.

Amen

Nina Smit : Elke dag ‘n vreugdepad

✉  :  Koningsdogters vir Jesus Page @ Facebook ♡

♡†♡ Aan God die drie-enige, alleen die eer! ♡†♡

mamma333  @  gmail.com